Ek het nie beplan om hierdie NOU al in te gooi as my tweede post nie, maar ek wou gou iets hieroor skryf.
Suid Korea, volgens ‘n hele paar webblaaie op die internet, is maar net so skuldig in terme van die mate van internetvryheid wat sy burgers geniet. Nie so erg soos hulle bure in Noord Korea nie, maar genoeg om wêreldwyd wenkbroue te laat lig. Freedom House in Washington het verklaar dat Suid Korea “gedeeltelike” internetvryheid geniet en is op dieselfde vlak as lande soos Nigeria, Brazil, Angola and Uganda.
Lank en die kort: webblaaie wat geblok word:
1) alle regeringswebblaaie van die Noord Koreaanse regering (ek het hieroor gelees en toe self Sondag gaan Google: “North Korea website”. By die eerste resultaat staan daar “Democratic People’s Republic of Korea” (met die webadres wat ek nie hier wil tik nie want netnou blok hulle MY blog). As jy daarop kliek, verskyn die volgende waarskuwing (screenshot vanaf my rekenaar, kliek daarop om te vergroot):
Hierdie boodskap is nie om te sê jy moet asseblief bly waar jy is, ons stuur die polisie nie (ek sit immers nog hier en nie by ‘n polisiestasie nie). Dis net ‘n waarskuwing wat sê dat jy nie toegang het tot hierdie webblad nie, die regering van Suid Korea het dit geblok. Sekere van die telefoonnommers onderaan is nommers wat jy glo kan kontak as jy enige spioene of “questionable” aktiwiteite wat bedryf word deur individue (wat lyk of dit die veiligheid van die land in gevaar stel) wil rapporteer. Dis nou regtig nie so erg soos die Stasi in Oos-Duitsland waar almal hulle bure verklik het nie (glo my die Suid Koreane het regtig beter dinge om te doen met hulle tyd), maar dis ‘n “net vir die wis en die onwis”.
2) webblaaie in Suid Korea wat simpatiek is teenoor Noord Korea
3) webblaaie en blogs (meestal die binne-in Suid Korea) wat die Suid Koreaanse regering kritiseer (hierdie is die sensitiefste aangesien dit nou begin lol met demokrasie, vryheid van spraak ensovoorts). ‘n Ruk gelede was daar sprake dat die nasionale spioenasie-agentskap van Suid Korea van daardie blogs infiltreer het en opinies oor die regering gaan verander het so skuins voor die verkiesing – so rapporteer Freedom House. En laastens……
4) pornografie (ek het nog nie hierdie een getoets nie, gaan ook eerder nie – daar is nie ‘n manier hoe ek aan die polisie kan verduidelik ek het “daardie” webblad besoek in die naam van navorsing nie! 😀 ….ander webblaaie sluit in die met videospeletjies wat té geweldadig is en/of kru taal gebruik.
Vir een of ander rede is Microsoft se soekenjin, Bing (by http://www.bing.com) hier in Suid Korea van so aard dat as jy na settings toe gaan en versoek om geen filter op jou soektog te hê nie (m.a.w. jy kies OFF by die filter) verander dit net eenvoudig outomaties elke keer terug na STRICT. Jy kan steeds die filter stel na OFF by Yahoo – hierdie het ek ook gaan toets ná ‘n artikel op die internet 🙂
Gaan lees meer hieroor by:
http://en.wikipedia.org/wiki/Internet_censorship_in_South_Korea
ooknetinkorea.wordpress.com 